Hindi na nakapalag sa otoridad ang mga suspek na bumaril sa isang 32- anyos na lalaki sa Barangay Gulod, Calatagan, Batangas noong Sabado ng hapon, Hulyo 15.
Ayon sa report ng Batangas Police Provincial Office, kinilala ang biktima na si Arlex Tameses Parra, may asawa, walang trabaho habang ang nahuling mga suspek ay sina Angelo Urcia y Ilustre, 54-anyos, may asawa, magsasaka at Larry Kevin Urcia y Garcia,30-anyos, walang asawa at pawang residente ng naturang bayan.
Lumalabas sa imbestigasyon ng pulisya, habang ang biktima ay nasa kusina ng kanilang bahay, dumating ang mag-amang suspek at bigla na lang binaril ang biktima ng ilang beses.
Nagtamo ng tama ng bala sa tiyan, dibdib at braso ang biktima na agad namang naisugod sa Calatagan Medicare Hospital.
Tumakas ang mga suspek sa hindi pa matukoy na direksyon gamit ang kulay itim na motorsiklo.
Agad na ikinasa ng Calatagan Municipal Police Station ang isang hot pursuit operation na nagresulta sa pagkakaaresto sa mga suspek sa Brgy, Lanatan, Balayan, Batangas.
Narekober sa mga suspek ang isang baril na umanoy ginamit sa pamamaril at motorsiklo na ginamit sa pagtakas.
Isasailalim sa Ballistic Examination ang narekober na baril habang ang mga suspek ay nasa kostudiya na ng pulisya at nahaharap sa kasong Frustrated Murder. I via Anna Gob
